Telangana-Caste Census | కుటుంబ సర్వేను చిత్త‌శుద్ధితో నిర్వ‌హించండి
Telangana-Caste Census | కుటుంబ సర్వేను చిత్త‌శుద్ధితో నిర్వ‌హించండి
సమగ్ర ఇంటింటి కుటుంబ స‌ర్వేపై ప్రత్యేకాధికారులతో సీఎస్ టెలీ కాన్ఫరెన్స్
Hyderabad : రాష్ట్ర ప్రభుత్వం అత్యంత ప్రతిష్టాత్మకంగా చేపట్టిన సమగ్ర ఇంటింటి కుటుంబ సర్వేను విజయవంతంగా పూర్తి చేసేందుకు చిత్త శుద్దితో కృషిచేయాలని రాష్ట్ర ప్రభుత్వ ప్రధాన కార్యదర్శి శాంతి కుమారి అధికారులను ఆదేశించారు. రాష్ట్రంలో జరుగుతున్న సమగ్ర కుటుంబ సర్వే నిర్వహణపై గురువారం ప్రత్యేకాధికారులతో టెలీ కాన్ఫరెన్స్ ద్వారా సీఎస్ సమీక్షించారు.
ప్రణాళికా శాఖ ముఖ్య కార్యదర్శి సందీప్ సుల్తానియాతో క‌లిసి ఈ టెలీ కాన్ఫరెన్స్‌లో సీఎస్ శాంతి కుమారి పాల్గొన్నారు. ఈ సంద‌ర్భంగా సీఎస్ మాట్లాడుతూ.. ఈ సర్వేకు సంబంధించి ఇంటింటి వివరాలను సేకరించి స్టిక్కరింగ్ చేసే ప్రక్రియ శుక్ర‌వారంతో పూర్తవుతుందన్నారు. ఈ నెల 9 నుండి అసలు సర్వే మొదలవుతుందని పేర్కొన్నారు. ఉమ్మడి జిల్లాలకు నియమితులైన ప్రత్యేకాధికారులు క్షేత్ర స్థాయిలో పర్యటించి, సర్వే జరుగుతున్న విధానాన్ని ప్రత్యక్షంగా పరిశీలించాల‌న్నారు. దీంతో పాటు జిల్లా కలెక్టర్లు, సర్వే నోడల్ అధికారులతో సమీక్ష సమావేశాలు నిర్వహించాలని స్పష్టం చేశారు. సేకరించిన వివరాలను కంప్యూటరైజేష‌న్‌ చేయడానికి నిష్ణాతులైన డాటా ఎంట్రీ ఆపరేటర్లను నియమించేలా చర్యలు చేపట్టాలని సూచించారు. అలాగే దేశంలోనే ప్రథ‌మంగా చేపట్టిన ఈ ఇంటింటి కుటుంబ సర్వే ప్రక్రియని రాష్ట్ర ముఖ్యమంత్రి పర్యవేక్షిస్తున్నారని వెల్లడించారు. ఈ సర్వేలో ప్రతీ ఒక్క కుటుంబం పాల్గొనేలా, ప్రతీ రోజూ ప్రజలను ఛైతన్యపర్చేలా విస్తృత ప్రచారం చేపట్టాలని తెలిపారు. ఏ ఒక్క ఇంటిని కూడా వదలకుండా పకడ్బందీగా నిర్వహించాలని జిల్లా ఆదేశించారు.
* * *
Leave A Comment